Eyaliko president wa Nigeria Good luck Jonathan asomoozezza amawanga g’Africa okukozesa obukulembeze obw’ennono okutumbula enkulakulana kubanga gwe musingi gw’okwegatta.
Goodluck bwabadde akyaddeko e Bulange Mengo ategeezezza nti amawanga g’Africa ebyafaayo byago kyenkana byebimu omuli okutawaanyizibwa abazungu mu kutemateema ssemazinga ono wabula engeri yokka gyegasobola okwerabira ebyafaayo ebyo kwekukwatagana n’obukulembeze obw’ennono okutumbula enkulakulana mu ntekateeka ezenjawulo omuli obulimi n’ebirala.
Goodluck ayagala amawanga gA’frica okulowooza ku ky’okwegatta n’okunyweza enkulakulana eyawamu.
Ono akkaanyizza ne katikkiro Charles Peter Mayiga ategeezezza nti obukulembeze bw’ennono bulina okwenyigira obutereevu mu nkulakulana n’anokolayo Buganda mu ntekateeka zaayo omuli mmwanyi terimba, ebisaakate n’ebirala ebitumbudde enkulakulana mu Uganda.
Mukwataddamula Mayiga era ategeezezza nti amawanga g’Africa getaaga okuzimba emisingi egyesigamako enkulakulana omuli okukyusa obukulembeze mu mirembe ensi n’esigala ng’etambula n’ebirala.